Kama leo utamuuliza Simon Msuva ni timu gani itatwaa taji la Afrika kwenye michuano ya AFCON 2017 inayoendelea huko Gabon, bila wasiwasi atakwambia Senegal.
Mchezaji huyu wa Yanga ameweka mkeka wake kwa Senegal kwa sababu anaamini uwezo na ubora unaooneshwa na wachezaji wa Senegal utasaidia timu yao kufika mbali na hata kubeba ndoo hiyo.
“Washambuliaji wa Senegal wapo makini sana wakiongozwa na mshambuliaji wa Liverpool Sadio Mane. Wanafunga magoli kila wanapopata nafasi hii itawasaidia kufika mbali,” anasema Msuva mchezaji wa kikosi cha Yanga anayefanya vizuri uwanjani kwa sasa na kuisaidia klabu yake kupata matokeo.
“Timu haiwezi kushinda kama haifungi magoli, lakini Senegal wapo vizuri hadi sasa bado hawajapoteza mechi hata moja kati ya michezo mitatu ya hatua ya makundi,” amesema Msuva ambaye mara kadhaa amekuwa akifananishwa na mshambuliaji wa Senegal Sadio Mane.
Senegal imefuzu kucheza robo fainali ya AFCON 2017 baada ya kufikisha pointi 7 ikiwa kinara wa Kundi B ikifatiwa na Tunisia yenye pointi 6. Senegal imeshinda mechi mbili na kutoka sare kwenye mechi ya mwisho katika hatua ya makundi.
Simba wa Teranga walipata ushindi wa 2-0 dhidi ya Zimbabwe, wakaifunga Tunisia 2-0 kabla ya kutoka 2-2 na Algeria. Wamefunga magoli 6 huku wao wakiruhusu magoli mawili katika mechi zao tatu.
Senegal ambao ni washindi wa pili wa taji hilo mwaka 2002 watacheza na Cameroon ambao ni washindi wa pili kutoka Kundi A kwenye mchezo wa robo fainali unaotarajiwa kuchezwa siku ya Jumamosi.
Post a Comment